Comeza a desbandada: medio centenar de militantes deixan o PP de Vigo pra afiliárense a Ciudadanos

O ex conselleiro de Economía e Industria do primeiro goberno galego de Alberto Núñez Feijóo, Javier Guerra, abandonou a militancia do Partido Popular para pasarse a Ciudadanos, nun camiño no que non estará só: outro medio centenar de afiliados do PP tomarán o mesmo rumbo.

As diferenzas entre Guerra e a dirección que encabeza Elena Muñoz provocaron que gran parte do grupo crítico de Vigo abandonase a militancia do PP. A baixa farase efectiva en dúas semanas, cando Guerra, que estivo 36 anos no PP, formalice a súa alta en Ciudadanos.

A formación que lidera Albert Rivera xa ofreceu o pasado mes de febreiro ao ex conselleiro un papel relevante dentro da súa estrutura en Vigo, onde conseguiu un 43% dos votos no último congreso local do PP ao que se presentou.

Guerra comunicou aos seus seguidores que non se presentará ás eleccións locais para facer fronte á propia Elena Muñoz e a Abel Caballero, o actual alcalde, pero que si tomará parte nas autonómicas do ano 2020 fronte a, se se dese o caso, Alberto Núñez Feijóo.

O ex conselleiro foi concelleiro no goberno de Vigo que encabezou Corina Porro no ano 2003, para logo ocupar unha cadeira de brazos no Congreso dos Deputados e no Parlamento galego, onde permaneceu ata o final da última lexislatura.