Galiza pode ser a zona máis afectada pola “brutal restruturación” anunciada polo Santander

0

A sección sindical da CIG no Banco Santander denuncia a intención da entidade de destruír 3.713 empregos. Unha restruturación “brutal” que pon de manifesto a “avaricia desmedida” dun banco que obtivo beneficios multimillonarios en 2018. A CIG advirte de que Galiza pode ser a zona máis afectada xa que banco, na xuntanza celebrada en Madrid, non o desmentiu e advirte de que defenderá todos e cada un dos postos de traballo.
O ERE afectará a 3.713 persoas e pecharán 1.150 oficinas, 57 xa a partir do 21 de xuño, 1 delas en Galiza, segundo se informou nesa xuntanza na que a CIG preguntou pola afectación a nivel galego, que non foi negada.

A existencia de tres redes a nivel galego, Santander, Pastor e Popular, fará que a restruturación sexa especialmente dura en Galiza”

A sección sindical alerta de que a existencia de tres redes a nivel galego, a do Santander, Pastor e Popular “fará que a restruturación sexa especialmente dura aquí”. Por iso xa demandou, no seu día, o mantemento do Banco Pastor, opción que tería permitido manter un maior nivel de emprego. “Pero a dirección desbotou a nosa proposta, sen que a Xunta de Galiza movese un dedo”.
Peches previstos
A entidade prevé ter pechadas, a 31 de decembro deste ano, 1.129 oficinas universais, das que a carga de traballo de 200 pasaría a ‘axentes comerciais’ e 21 de banca privada, todas de orixe Banco Popular. Isto afectará, segundo a sección sindical da CIG, a 2.847 persoas na rede comercial, a 588 na rede de apoio e a 278 nos servizos centrais, onde habería 15 unidades afectadas.
Malia a representación da CIG preguntar polo impacto a nivel galego, a resposta do banco foi que facilitarían con posterioridade os datos de impacto por territorios con posterioridade. “Non será na seguinte reunión do 16 de maio, onde o Banco quere facer a presentación da ‘empresa de colocación’ que se encargará de buscar traballo ao persoal despedido”.
A sección sindical da CIG advirte de que aínda “estamos ante o inicio do proceso, onde as empresas normalmente inflan as cifras para poder alegar que negociaron, pero en todo caso a restruturación será brutal”.
Alerta de que a proposta do banco levaría á destrución de todo o emprego das oficinas  que van pechar “cando a día de hoxe xa sufrimos unha sobrecarga abusiva” e reitera que defenderá todos e cada un dos postos de traballo.

Siguenos en Google News
También podría gustarte
Ver comentarios de la noticia

Deja una respuesta

Su dirección de correo electrónico no será publicada.

Enable Notifications    Ok No thanks