A empresa Textil Lonia, o Concello do Pereiro e a Xunta seguen a vulnerar a lei a pesar do risco de incendio

Dende a CIG de Ourense denuncian que a pesar das tres resolucións firmes do Concello do Pereiro de Aguiar dando un prazo de 15 días para limpar a maleza das instalacións da empresa Sociedad Textil Lonia “a normativa en materia de prevención de incendios segue sen cumprirse”.

Critican que “mentres a Xunta lembra, día si e día tamén, que estamos en período de máximo risco, e que a veciñanza ten a obriga de limpar as franxas de seguridade (50 metros) ao redor das edificacións, estase a permitir que xestas, acacias, piñeiros, uces e todo tipo de mato e especies pirófitas sigan a medrar a escasos metros dun complexo de naves industriais no que traballan preto de 750 persoas e no que se estacionan uns 400 coches nunha extensa parcela na que hai unha única saída”.  

Na empresa traballan preto de 750 persoas e estacionan uns 400 vehículos

Por iso alertan que no caso de se producir un foco incendiario no exterior ou proximidades da fábrica, “a propagación sería fulgurante e as consecuencias inimaxinábeis”. Ademais, inciden en que non se trata dunha problemática nova, xa que a CIG xa a ten denunciado en repetidas ocasións.

O 3 de xullo de 2018 a central comunícalle ao Concello do Pereiro o risco existente, que un mes despois emite a primeira resolución dando 15 días de prazo a Textil Lonia para que proceda á poda e limpeza da franxa de 50 metros. O 31 de agosto volve comunicarlle a situación, xa que todo sigue igual.

Estuda presentar denuncia

Até o 24 de outubro non se produce unha nova resolución establecendo outros 15 días de prazo para a realización dos traballos. Xa neste ano, o 27 de marzo a CIG pon os feitos en coñecemento da Consellería do Medio Rural, que dá novamente traslado ao Concello do Pereiro. E finalmente o 3 de xuño hai unha nova resolución do Concello, concedendo outros 15 días.

“Pero a día de hoxe todo segue igual, e se houbo algunha limpeza na parte de arriba das instalacións non foi por establecer a franxa de seguridade, senón porque se está a proceder ao desmonte dun espazo para a ampliación das naves industriais”, indican.

Polo tanto, dende a CIG esíxenlle á Xunta, ao Concello do Pereiro e a Textil Lonia que cumpran a lexislación e protexan a vida das persoas e as instalacións, “e facémolos responsábeis das consecuencias que se poderían dar no caso de incendio”. Ademais, adiantan que están a consultar cos servizos xurídicos da central “a posibilidade de poñer estes gravísimos feitos en coñecemento da xustiza, por se houbera que depurar responsabilidades”.